قرمزی راتوں کا جادو
۔۔۔۔۔۔۔۔۔۔۔۔
قرمزی راتوں کا جادو
خواہشوں کو بال و پر دیتا ہے
نغمے کو
ہوا کے پائوں کی زنجیر کر دیتا ہے
اور پھر ہر نَفَس کو رنگ
ہر احساس کو خوشبو کی خلعت نذر کرتا ہے
تھرکتی رقص کرتی ساعتوں کو
وصل کا پیغام دیتا ہے
(یہی آتش فشاں لمحے ہماری خواب گاہوں کو
ہماری خواہشوں سے گرم رکھتے ہیں)
خیالوں پر کمندیں ڈالتا ہے
اَدھ کِھلے غنچوں کے ہاتھوں میں
چھلکتے جام دیتا ہے
دلوں کو مضطرب کرتا ہے
اور آنکھوں میں سورج گھولتا ہے
۔۔۔۔۔۔۔۔۔۔۔۔۔۔۔۔۔۔۔قرمزی راتوں کا جادو ۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مجموعہ کلام: خوابوں سے تراشے ہوئے دن
ناشر: بزمِ تخلیقِ ادب پاکستان، منیبہ آرکیڈ، گلستانِ جوہر، کراچی
اشاعتِ اول: دسمبر ۱۹۹۸ء
